TANBÁ SÁ ITA BOLU FINADU

    Liafuan Finadu mai hosi lia Latín "fīnis" ne’ebé signifika fin ka hotu ona, no adota mai lian portugés liu-hosi verbu "finar" ho forma partisipiu pasadu “finado”, katak hotu ona, mate ona, to’o limite ona ka to’o ona ninia rohan. Tanbá ita ema moris sempre iha fin ka rohan atu lakon.

Ita ema nia moris hasoru faze bo'ot tolu, mak hanesan :

1. Ita mosu mai (aparesimentu). 
2. Ita iha no moris (ezisténsia) no 
3. Ita lakon ka mate (dezaparesimentu). 

          Hahú kedas hosi Sékulu II, iha ona sinál katak ema sarani hotu reza ba sira-nia maluk ne'ebé mate ona no vizita sira-nia rate. Nune'e, la kleur de'it Igreja Katólika tau tiha ida-ne'e ba ninia kostume no iha Sékulu V sai nu'udar toman ida hodi dedika loron ida kada tinan atu reza ba ema hotu ne'ebé mate ona, liu-liu ba sira hirak-ne'ebé la iha família atu reza ba sira-nia klamar.

        Iha momentu ne'ebá seidauk iha data fiksu ba loron finadu. Nune'e, iha Sékulu XIII maka responsavel Igreja sira hili no universaliza loron 2 Novembru nu'udar data fiksu no obrigatóriu hodi komemora finadu iha mundu Katóliku tomak. Sira hili data ne'ebé tuir kedas loron selebrasaun ba Santu hotu-hotu, maka 1 Novembru. Kona-ba selebrasaun loron Santu hotu-hotu nian ne'e, iha tinan 835 h.K, maka Papa Gregório IV hili data ne'e hodi reza no hanoin hikas no fó-omenajen ba matebian sira-ne'ebé uluk dedika-an tebes iha fiar sarani nian maibé  haluha atu reza ba sira (heróis da fé).

        Tuir istória no orijen iha leten, loron 2 Novembru nu'udar feriadu Katóliku ba ema sarani sira hodi reza ba sira ne'ebé mate ka iha ona fin ba sira-nia moris (finadu = fin ka rohan ba moris). Ba país sira-ne'ebé dominante ho Katóliku adota mos loron ne'e ba feriadu nasionál, ezemplu Timor-Leste nomós país sira seluk tan. 
        Tanbá uluk liu, molok kolonizasaun portugeza, ita-nia beiala sira sei jintiu hela no ita-nia fiar maka animizmu (fiar ba be'e-matan lulik, fatuk, ai no foho lulik sira, nst.) deit, nune'e ita seidauk ka la komemora loron ne'e. Maibé hafoin tiha Portugál tama hodi koloniza rai Timór no halekar fiar Katólika no hahú fó sarani ema sira, maka ita mos hahú selebra loron ne'e tanbá ema sira-ne'ebé sarani ona mate no hakoi tiha tuir tradisaun Katóliku no kultura nian. Nune'e, to'o ohin loron tradisaun ida-ne'e buras ona iha ita-nia kultura no grupu étniku ida-idak selebra kahur ho lisan lokál ne'ebé iha, hanesan ema moris (ezisténsia) tau loron ida ne'ebe mak familia bo'ot husi kada lisan halibur hodi halo soru-mutu iha idak-idak nia knu'a hodi reza ba sira heróis da fé.

husi liafuan xave : Aparesimentu, Ezisténsia, Dezaparesimentu.

Hakerek nain fiar katak liu testu badak ne'e bele ajuda ita atu kompriende sa'ida maka Finadu.  

"Bom Finado ba ita hotu"